த்ருஷ்டத்யும்னன்
சிறுவர் பூங்கா
பாஞ்சால தேசத்தின் மன்னன்
துருபதன். அவருக்கும் துரோணருக்கும் இடையில் இருந்த நட்பு மாறி,
மனக்கசப்பும் பகைமையும் தோன்றின. துரோணரை எவ்வாறேனும் வெற்றி கொள்ள
வேண்டுமென்று துருபதன் விரும்பினார். உபயஜா என்ற முனிவரைக் கொண்டு
பெரியதொரு யாகத்தை நடத்தினார். துரோணரை முறியடிக்க ஒரு மகனும் அர்ஜுனனை
மணமுடிக்க ஒரு மகளும் வேண்டும் என்பதே யாகத்தின் நோக்கமாக இருந்தது.
உபயஜா முனிவர் யாகத்தை நடத்திய
போது, வேள்வித் தீயிலிருந்து வீரத்திருமகன் ஒருவன் தோன்றினான். அவன்
வில்லும் அம்பும் தரித்து மாவீரனாக வெளிப்பட்டதும், துருபதன், அவனே தன்மகன்
‘எவராலும் வெல்லற்கரியவன்’ என்ற பொருள் விளங்க ‘த்ருஷ்டத்யும்னன்’ என்று
பெயர் சூட்டி மகிழ்ந்தான்.
அதே வேள்வித் தீயில் தோன்றிய
அழகிய இளம் பெண்ணுக்கு ‘கிருஷ்ணை’ என்று பெயரிட்டனர். அவளே திரௌபதி.
த்ருஷ்டத்யும்னன், வீரனாகவே பிறந்த போதிலும் அக்காலத்தில் அஸ்திர
வித்தையில் சிறந்து விளங்கிய துரோணரிடம் பயிற்சி பெற்றான்.
திரௌபதி மணப்பருவமடைந்தாள்.
அவளை அர்ஜுனனுக்கு மணமுடிக்கவே துருபதன் விரும்பினார். ஆனால் பாண்டவர்கள்
வாராணாவதத்தில் அரக்கு மாளிகை தீப்பற்றியதால் இறந்து போனார்கள் என்ற
செய்தி கேட்டு துக்கமடைந்தார். இறக்கவில்லை; எங்கோ இருக்கிறார்கள் என்றும்
சிலர் கூறக்கேட்டு ஆறுதலடைந்தார். அர்ஜுனனால் மட்டுமே வெல்ல முடியும்
என்னும் படியாக ஒரு பந்தயத்தை வைத்து திரௌபதிக்கு சுயம்வரம் நடத்தினார்.
சுயம்வரத்திற்கு மன்னர்கள் பலர் வந்தார்கள். ஏக சக்ர நகரத்தில்
பிராமணர்களைப் போல வேஷம் தரித்து வாழ்ந்து வந்த பாண்டவர்களும் சுயம்வரம்
பற்றிய செய்தியறிந்து பாஞ்சால தேசத்துக்கு வந்தார்கள். பந்தயத்தில்
அர்ஜுனன் வென்றதும் திரௌபதி அவனுக்கு மாலையிட்டாள். திருஷ்டத்யும்னன்,
அவர்களைப் பின் தொடர்ந்து ஏகசக்ர நகருக்குச் சென்றான். பாண்டவர்கள்
தங்களுக்குள் பேசியதைக் கேட்டபின்பு, திரௌபதியை வென்றது அர்ஜுனனே என்று
கூறி தந்தைக்கும் மகிழ்ச்சியை அளித்தான்.
ஒப்பற்ற வீரனாகத் திகழ்ந்த
த்ருஷ்டத்யும்னன், பாண்டவர்களின் உற்ற நண்பனாக விளங்கினான். பாரதப் போரில்
த்ருஷ்டத்யும்னன் சேனாதிபதியாக நியமிக்கப்பட்டான். பதினைந்தாவது நாள்
யுத்தத்திலே, துரோணரை எதிர்த்துப் போரிட்டான். இருவருக்கும் கடுமையான
போர் நிகழ்ந்தது. துரோணரை, தந்திரத்தால் மட்டுமே வெல்ல முடியும் என்று
கிருஷ்ணர் ஒரு யுக்தி செய்தார். “அஸ்வத்தாமா ஹத: குஞ்சர:” அஸ்வத்தாமா
என்ற யானை இறந்தது என்று தருமரைக் கூறவைத்ததும், துரோணர் சரியாகக்
கேட்டுப்புரிந்து கொள்ளாமல் தம் மகன் அஸ்வத்தாமா தான் இறந்து விட்டான்
என்று எண்ணி ஆயுதங்களைக் கீழே போட்டார். தேர்த்தட்டில் சாய்ந்தார். இதுவே
தகுந்த சமயம் என்று த்ருஷ்டத்யும்னன் அவரைக் கொன்றான். தந்தை இறந்ததைக்
கேள்வியுற்ற அஸ்வத்தாமா கொதித்தெழுந்தான்.
பாரதப் போர் முடிவுற்ற நாளில்
இரவோடிரவாக, பாண்டவர்களின் பிள்ளைகளையும், த்ருஷ்டத்யும்னனையும், அவர்கள்
தூங்கும் போது, அஸ்வத்தாமா கொன்றான். மகாவீரனாக விளங்கிய துருபதபுத்திரன்,
குரு துரோணரை அதர்மமாகக் கொன்றதால், அவனுக்கு இத்தகைய கொடுமையான முடிவு
ஏற்பட்டது.
த்ருஷ்டத்யும்னனுக்கு
த்ருஷ்டகேது, க்ஷத்ரதேவா, க்ஷத்ர வர்மா, க்ஷத்ரஞ்சயா எனப்பல புதல்வர்கள்
இருந்தார்கள். அவர்களும் பாரதப்போரில் உயிரிழந்தார்கள்
கருத்துகள் இல்லை:
கருத்துரையிடுக
மஹாகணபதிபிள்ளையார் ஆலயம் வேலணையில் பிரபல்யமான ஆலயம்